VIGAN CITY – Gapu ti kinangato ti presio ti ganagan, direct importation ti madama nga ipagpagna ti gobyerno probinsial, daytoy ti impalgak ni Gov. Deogracias Victor “DV” Savellano bayat ti taripnong dagiti mamayor iti provincial capitol hall ditoy itay Hunio 25.
Kinuna ni Savellano a no direkta nga agimport ti Ilocos Sur iti abono, dakkel ti bumabaan ti presio iti manipud P1,000 agingga iti P1,500 iti maysa a sako.
Kitkitaen a pagangkatan ti gobierno probinsial iti abono ti Qatar ken Russia.
Kinuna ni Savellano a madama nga ar-aramiden ti gobierno probinsial dagiti masapul a maisubmite kas iti surat a maiturong iti Philippine National Bank (PNB) tapno ti gobierno probinsial ti maki-negotiate nga agangkat iti abono.
Agdagup iti 12,500 metric tons ti angkaten ti provincial government a ganagan a manamnama a maisanglad iti Salomague Port iti Cabugao wenno iti Currimao, Ilocos Norte.
Nadakamat pay ti gobernador a maysa a programa a madamana nga ipatpatungpal ti pannakaidur-as dagiti high value crops babaen ti panangguyugoyna kadagiti taga-upland municipalities iti panagmulada kadagiti exotic foods kas iti durian, marang, lansones, ken rambotan.
Kinunana a maysa nga ektaria ti mabalin a mamulaan sadiay Suyo kalpasan ti napintas a naapit iti napalabas a tawen.
Karaman pay ditoy ti panagmula iti saba a nakikinnamayetan ti Ilocos Sur Polytechnic State College iti Sta.Maria para iti nadaras a pannakapaaduda.
Karaman a dimmar-ay iti miting ti mayors’ league da Agriculture regional executive director Cipriano Santiago, ti chairman ti National Anti-Poverty Commissioner Domingo Panganiban, dagiti municipal agriculture officers, ken pannakabagi ti NFA-Ilocos Sur.#
