Gobierno probinsial kadagiti mannalon: utang ti Tomato Paste Plant, mabayadan

VIGAN CITY – Impatalged ni Bise Governador Jeremias “Jerry” Singson a saan a tallikudan ti gobierno probinsial dagiti mannalon a di pay nabayadan ti kamatisda ken dagiti empleado a di pay nasuelduan ti Tomato Paste Plant.

“Saantayo a tallikudan dagiti mannalontayo. No adda nagkibaltangan ti Tomato Paste Plant, kitaentayo ti mabalintayo nga aramiden ta tulongantayo met dagiti mannalon a di pay nabayadan (ti kamatisda) ken pati dagiti empleado tapno maitedto met la ti sueldoda,” kinuna ni Singson bayat ti kabarbaro a programana iti radio itay nabiit.

Segun iti bise gobernador, naammuanna bayat ti pannakipatangna kadagiti mannalon a malaksid dagiti mannalon ti probinsia a nakautangan ti Tomato Paste Plant iti sumurok-kumurang P3 milion, di pay nabayadan dagiti mannalon iti Ilocos Norte iti sumurok-kumurang P5 milion.

Naammuan pay ni Singson a di pay naited ti planta ti tallo bulan a sueldo dagiti empleado ditoy.

Aganay a 50 a mannalon ti napan iti pagsessionan idi Marso 5 para iti pannakidialogoda iti mangimatmaton iti Tomato Paste Plant mainaig iti di pay nabayadan a kamatisda idi pay la 2006-2007.

Ngem nadismaya dagiti mannalon ta awan ti nagparang a pannakabagi ti planta. Saan a nakatabuno ni Manager Madeline Arce ket naammuan nga adda iti Manila.

“Nupay kasta, sinangailitayo dagiti mannalon antes ti session ket naammuantayo ti naan-anay nga impormasion ti agdama a kasasaad ti Tomato Paste Plant,” kinuna ni Singson.

Segun iti bise gobernador, iti pannakipatang ni Arce kenkuana iti telepono kasakbayan ti session, kinuna daytoy a nagpatangandan ken Gov. Savellano nga ibirokan ti gobierno probinsial ti solusion iti agarup P8 million a bayad ti apit a kamatis dagiti mannalon ken sueldo dagiti empleado aginggana inton umay a bulan.

Segun ken ni Singson, “dakami iti hunta probinsial, awan ti pannakaammomi iti pannakapataray ti Tomato Paste Plant” idinto nga innayonna a saan a bibiangan ti gobierno probinsial ti TPP agsipud ta adda maysa nga organisasion a nakaipaimaanna ket “nangted (laeng) ti gobierno probinsial iti subsidy idi damdamona nga ag-operate a mangtulong kadagiti mannalon.”

“Kitaenmi a naimbag ti mabalinmi nga aramiden tapno kasta, maammuanmi ti sigud ken gapuna daytoy a problemayo ken iti kadarasan a pangsolusion iti problemayo,” impatalged ni Singson kadagiti mannalon.

Kinuna ni Singson a no adda sumangpet a bingay ti probinsia iti RA 7171, “no ania ti kuna ni Apo Gobernador, nakasaganakami a tumulong a mangpatibker ken mangibanag kadagita a pundo tapno laeng matulongan dagiti mannalon a di nabayadan ken dagiti empleado a di nasuelduan.