Gobierno probinsial, papigsaenna babassit a negosio

Vigan City – Kas paset ti programa ti gobierno probinsial a mangpapigsa iti negosio ditoy, inangayna ti localization and harmonization workshop babaen ti pannakikammayyet ti Department of Trade and Industry.

Babaen ti nasao a workshop, nakita dagiti timmabuno nga small and medium entreprenuers (SMEs) dagiti pagpigsaan,pagkurangan ken pagkasapulan dagiti negosioda para iti pannakaital-o dagiti nadumaduma a produktoda iti probinsia.

Kinuna ti gobernador a sisasagana ti gobierno probinsial a mangipaay iti aniaman a tulong kadagiti SMEs.

Kinuna ti gobernador a rumbeng laeng a matulongan dagiti SMEs tapno maddaan iti direksion dagitoy a negosiante tapno nasayaat ken nangato ti kalidad dagiti mapartuat a lokal a produktoda  ket agbalinda a competitive kadagiti sabali a lugar.

Nadakamat ti gobernador nga adu dagiti produkto iti probinsia a mailako tapno maproseso iti sabali a lugar, kas iti mani, bawang, asin ken dadduma pay a produkto a saan a maik-ikkan importansia.

Naidatag bayat ti workshop dagiti pakaseknan dagiti  agar-aramid kadagiti local delicacies kas iti bibingka, tinubong, kalamay, peanut butter, polvoron, chichacorn, longganisa, kamote and banana chips, polvoron, bagnet, dagiti pay kape, lasona, bawang ken dadduma pay a produkto kas kadagiti local crafts ken furniture, kas  iti  processing, labeling, financing ken marketing dagiti produkto.

Limtuad iti nasao a workshop a kurang dagitoy iti usaren iti processing kasta met ti pannakapasayaat ti labeling dagiti produktoda kas maysa a pangawis kadagiti aggatang.

Impanamnama ti gobierno probinsial a makatulong iti financing babaen ti maysa a kooperatiba nga agpautang kadagiti SMEs ken iti pannakitinnulong dagiti maseknan nga ahensia ken local government units para iti pannakailako dagiti nasao a produkto.#