Gobierno probinsial ti Ilocos Sur, pinadayawan ti Philippine Army

Karaman ti gobierno probinsial ti Ilocos Sur kadagiti pinadayawan ti Philippine Army bayat ti panangselebrarna iti maika-118th Founding Anniversary itay Marso 23.

Mismo a ni Defense Secretary Voltaire Gazmin ken Philippine Army Chief Lt. Gen. Hernando Iriberri ti nangipresentar iti Command Plaque ken ni Ilocos Sur Provincial Administrator Cara Peredo a nangibagi ken ni Gov. Ryan Singson.

Napadayawan ti gobierno probinsial kas pammigbig ti Philippine Army iti suporta ti gobierno probinsial kadagiti nadumaduma a programa ken proyektona para iti pagsayaatan ti komunidad kas kadagiti medical mission ken panagmula iti kaykayo ken pannakaipatakder dagiti sumagmamano nga istruktura ti kampo ti PA iti probinsia.

Immawat met iti Command Plaques ti National Bookstore Foundation, Inc., HERO Foundation, Inc., ken ti Leonio Group of Companies.

Immun-una ngem daytoy, indeklara ti PA ti Ilocos Sur a peaceful and friendly province idi damo a tawen a panagtakem ni Singson kas gobernador.#