Gobierno ti siudad, nakatuon iti ekonomia ti Heritage City

VIGAN CITY – Iti  panagtakemna a mayor, kinuna ni Mayor Eva Marie S. Medina a kayatna nga ad-adda nga ituon ti administrasionna iti ekonomia ti Heritage City ditoy.

Kinuna ni Medina nga iti immuna nga strategic planning ti gobierno ti siudad, nakatuon no kasano nga agprogreso ti maysa a Heritage City.

Kinunana nga iti sumaruno nga strategic planning, in-inawenda a ti pannakailugar ti ekonomia iti Heritage City.

“Usually, ammotayo a ti kultura, saan a maidilig iti economic development, ngem ditoy Vigan, uray no ipatpategtayo ti nabaknang a kulturatayo, side by side, maar-aramid ti development ti ekonomiatayo,” kinuna ni Medina bayat ti interbio kenkuana ti DWRS itay nabiit.

“Ita, kayattayo nga ad-adda nga ituontayo iti ekonomia iti Heritage City,” kinuna ni Medina sana innayon a “saan laeng a maigapu kadagiti souvenir shops, dagiti tourism related a pasilidades, no di kayattayo pay a kitaen no kasano a makasapul dagiti kalugarantayo iti panaggianda iti Heritage City.”

Kanaig daytoy, inggunamgunam ni Medina ti ad-adda pay a panagtrabaho dagiti pangulo dagiti nadumaduma nga ahensia iti gobierno ti siudad tapno maited iti naan-anay a serbisio kadagiti tattao.

“Saan nga amin a tattao ditoy Vigan maikkanda iti oportunidad nga agtrabaho iti gobierno iti serbisio dagiti umili, ket dapat saanda a sayangen daydiay nga oportunidad,” kinuna ni Medina sana inyunay-unay a “no sayangenda, saan a dakayo iti Media, saan a dakami a mangidadaulo kaniada ti saanda a pagserserbian no di ket dagiti tattao mismo a paggapgapuan ti sueldoda.”

Inyarig ti mayora dagiti dadaulo ti ahensia ti gobierno ti siudad iti parada nga adda maysa nga agpaliar a lugan ken di nasayaat ti andarna ket “saan met a mabalin nga iyuraytayo isuna a mamagbalin iti luganna,” kinuna ni Medina.

“Ita no dagiti dadduma saanda a makitinnulong ken saanda nga agtrabaho a nasayaat, mangtudingtayo iti sumukat kadakuada,” kinuna ti mayora idinto nga impaganetgetna a sanguenda ti “consequences” ti dida panangannong a nasayaat iti pagrebbenganda.#