Gov. Chavit, Gov. Imee, kapolisan, instrumento pannakaisalakan biktima ti pannakaramrames

VIGAN CITY – Nagtitinnulong ti sumagmamano nga agtuturay, ahensia ti gobierno, ken kapolisan iti pannakaisalakan ti maysa a menor de edad a mapapati a nagbalin a sex toy ti kalib-in ti maysa nga overseas Filipino worker iti aganay lima a tawen.

Impalgak ni Jean Maniego, 33, dati nga OFW a taga-Pampanga, ken ina ti biktima a nailinged iti nagan nga Angel,  sumagmamano nga ahensia ti gobierno ken agtuturay ti nagpatulonganna tapno maisalakan ti anakna iti panangramrames kenkuana ti kalib-inna a ni Constante Bolante, Jr. y Carta 34, residente iti Barangay Cabcaburao, Burgos, Ilocos Sur.

Kinuna ni Maniego nga immuna a napan nagpatulong iti Bantay Bata, Manila ket imbagada nga agpatulong iti Department of Social Welfare and Development a nangiballakad iti ipapanna iti opisinada iti Ilocos Sur nga isu ti mangasistir kadakuada iti problemada.

Kinuna ni Maniego a kinuyog ti maysa nga empleado ti DSWD iti National Bureau of Investigation ngem agsipud ta “medio nabuntog ti panagaksionda”, napanda nagpatulong iti CIDG a nangipatalged a mangisayangkatda iti rescue operation para iti pannakaisalakan ti anakna.

Kinuna ni Maniego a malaksid iti CIDG, nagpatulong pay iti UNDP, ket daytoy ti timmawag ken ni Gov. Imee Marcos a timmawag met ken ni Bonito Singson, kabsat ni Gov. Luis “Chavit” Singson.

Segun ken ni Maniego, dinamag ni Bonito no am-ammona ni Gov. Singson ket idi insungbatna a nakitanan ti gobernador, imbaga ni Bonito a tawaganna ti gobernador sana inted ti numero ni Maniego tapno ni Gov. Chavit ti mangtulong kenkuana.

Kinuna ni Maniego nga idi naammuan ni Gov. Singson ti problemana, kinapatangna ti CIDG para iti madagdagus a pannakaisayangkat ti rescue operation ngem kinuna ti dadaulo ti CIDG a delikado agsipud ta rabii ken adda armas ti suspek.

Idi agsapa ti Nobiembre 30, rinaut dagiti nagtitipon nga elemento ti Ilocos Sur Provincial Police Office nga indauluan ni P/S Supt. Noel Balita Amoyen ken CIDT nga indauluan ni PCInsp. Arbel Mercullo ti pagtaengan ni Bolante iti nadakamat a barangay.

Saan a nagresistir ti suspek idi nakitana a napalawlawan ti balayna kadagiti polis.

Nasukalan pay dagiti polis nga adda iduldulin ti suspek a nadumaduma a paltog, magasin ken ginasut a bala bayat ti panangisayangkatda iti operasion a mangisalakan ken ni Angel a nagbalin a sex toy ti suspek iti aganay lima a tawen.

Iti pannakiuman ni Maniego ken ni Eugene Paet a naipatangatang iti DWRS babaen ti programa a Barangay Commando Brigada ni anchorman Jun Ramos, insalaysayna nga iti Pampanga ti nagam-ammuanda ken ni Bolante ta asideg laeng ti balayda iti apartment nga inupaan ti suspek.

Mapapati a nagpakni iti Pampanga ni Bolante agsipud ta adda tinarayanna a problema iti Burgos, Ilocos Sur.

Naaddaan iti relasion dagiti dua ket kadarato mapanda agbakasion iti Burgos, Ilocos Sur.

Segun ken ni Maniego, nangrugi a rinames ti kalib-inna ti anakna idi nagbakasionda iti Burgos idi 2007, idi agtawen laeng daytoy iti sangapulo ket maysa.

Kinunana nga adda dagiti kanito a seknan ti panagatap a “gargarawen” ti kalib-inna ti anakna agsipud ta adda dagiti gundaway a maduktalanna ti anakna a nakamulengleng.

“Ngem no damagek, awan met ti ibagbagana,” kinuna ni Maniego sana innayon a mabuteng ti anakna agsipud ta mapapati a pinangtaan ti suspek a patayenna no agpulong daytoy iti inana.

Kinuna ni Maniego nga iwayat ti suspek ti panangramesna iti anakna no adda ar-aramidenna a mabayag ti kaawanna iti balay, kas iti panaglabana wenno ipapanna pannakitienda.

Impalgak ni Maniego nga adda pay video ti suspek ken ti anakna bayat ti panagkanaigda a naaramid bayat ti panaglablabana iti ruar.

Kasta met nga idi nagsikog ti anakna, pinagparang ti suspek a maysa a kaeskuelaan ti anakna a taga-Pampanga ti nakasikog kenkuana.

Innayonna a kasla balud ti anakna a nakapupok iti balay ti suspek idi masikog ket idi agpasikalen, limed nga inlugan ti suspek iti van sana intaray iti ospital a naganakanna.

Kinuna ni Maniego a sa laeng nagpudno ti anakna idi Nobiembre 22 daytoy a tawen. agsipud ta ginaraw manen ti suspek iti baet a di pay nakaung-ungar iti panaganakna.

Iti dayta a naammuanna, inkeddeng ni Maniego ti panagpatulongna kadagiti ahensia ken kapolisan no kasano a maisalakan ti anakna manipud iti suspek.

“Natalnan ti nakemko ta naisalakanen ti anakko,” kinuna ni Maniego idinto nga impeksana ti panagyamanna kadagiti nangtulong kenkuana iti pannakaisalakan ti anakna a biktima ti pannakaramrames.

“Nangruna nga agyamanak ken ni Gov. Singson ta napadaras ti pannaka-rescue ti anakko,” kinuna ni Maniego.#