Gov. Imee, Cong. FariƱas, awan kasangoda; labulabo ti kinamayor ti Laoag City

LAOAG CITY – Kas ninamnama, awan ti kasango ni Gov. Imee Marcos iti daytoy a panagpailayonna iti puestona iti Mayo 13, 2012 polls. Kasta met nga awan ti sumango iti kasinsinna a katiketna, ni Vice Gov. Angelo Marcos-Barba.

Sakbay ti intuding ti Commission on Elections a panagipila dagiti kandidato iti COCda, indeklara ni Pagudpud Mayor Engr. Reynolan Sales a tumaray a para gobernador ngem saan a nagtuloy ket nagipila ketdi iti kandidaturana a para bise mayor iti ilina a katiket ti asawana a ni Mayor Maja Sales.

Ngem ti Laoag City ti pakaituonan la ketdi ti imatang dagiti botante ken agpalpaliiw iti politika iti eleksion inton Mayo 13, 2013 agsipud iti kaburnok dagiti agkandidato para iti puesto ti mayor a bakantean ni Mayor Michael FariƱas.

Saanen nga agkandidato pay ni FariƱas agsipud ta maturposnan ti maikatlo a nagsasaganad a terminona kas mayor.

Dagiti met laeng miembro ti pamilia FariƱas ti kaadduan kadagiti agsasango iti kinamayor a pakaibilangan ti asawa ti mayor a ni Chevylle FariƱas, presidente ti Association of Barangay Captains, nga immuna a nangipila iti kandidaturana para mayor idi Oktubre 1 iti babaen ti Liberal Party.

Nagipila met iti kandidaturana ti kabsat ni Cong. Rodolfo FariƱas, ni dati a Laoag Mayor Roger FariƱas,Ā  ni dati a Mayor Cesar Ventura, ken ni Marcial FariƱas.

Adu ti nasdaaw iti panangipila met ni dati nga Gobernador Michael Keon iti kandidaturana para mayor kas independiente.

Iti kina-bise mayor, nangipila iti kandidaturada ni Rosanee Ablan, Maria Manuel ken Roseleny Oroceo. Nupay kasta, mapapati a masukatandanto babaen ti substitusion.

Iti umuna a distrito ti probinsia, unopposed ni incumbent Rep. Rodolfo FariƱas iti panagpailayonna iti puestona.

Iti maikadua a distrito, tallo nga independiente ti nangipila iti kandidaturana para diputado a mangsango ken ni reelectionist Rep. Imelda R. Marcos a pakaibilangan daĀ  Atty. Ferdinand Ignacio, taga-Paoay; Arlene Jocelyn Butay, ken ni Lorenzo Madamba, agpada a taga-San Nicolas.

Sabali a namagsiddaaw dagiti umili ti panagipila ti anak ni Gov. Marcos, ni Michael Marcos Manotoc, a para mayor iti Batac City.#