Gov. Roque B. Ablan Sr.: di nagpaadipen kadagiti Hapon idi Maikadua a Gubat Sangalubongan

Mabigbig daydi Gov. Roque B. Ablan Sr. saan laeng a kas lider iti Ilocos Norte no di ket kas napeklan a nasionalista a di pulos simmuko ken nagpaadipen kadagiti Hapon idi bimtak ti maikadua a gubat sangalubongan.

Nagturpos ni Ablan iti abogasia iti University of the Philippines, ken maysa kadagiti bar topnotchers (maika-9) iti bar exam idi 1930. Nagtakem  a gobernador  ti Ilocos Norte idi 1937 iti tawenna a 30. Bayat ti kinagobernadorna, pinapintasna ti kapitolio ti probinsia, inyestablisarna ti Ilocos Norte Provincial Hospital, naipatakderna ditoy ti maysa a sanga ti Philippine Normal College ken napasayaatna dagiti kangrunaan a dalan.

Nabutosan manen a gobernador iti 1941 ngem isu metten daydi panangrugi ti maikadua a gubat sangalubongan. Imbes a sumuko kadagiti Hapon, binukelna ti maysa a guerrilla unit, kaduana ni Feliciano Madamba. Gapu iti adu a naaramidan ti grupo nga Ablan-Madamba kangrunaanna iti pannakatambang dagiti soldado a Hapon, binigbig ni Gen. Douglas MacArthur ti grupo ken sinuportaranna babaen ti panangitedna iti armas. Maigapu met iti daytoy, indiaya dagiti Hapon ti panagbalinna a gobernador ti Ilocos Norte tapno malapdan ti ad-adu pay a matay a soldadoda ngem dina inawat.

Malaglagip ni Gov. Ablan iti kinunana iti pamiliana sakbay ti panagpakadana kadakuada iti 1943 a kapades ti gubat: “No la koma mabalin a dua ti biagko. Maysa koma ti ipaayko kadakayo a pamiliak ken itedko met iti pagilian ti maysa.”

Daytan ti naudi a pannakakita dagiti kameng ti pamiliana kenkuana.

Itay Agosto 9, 2011, sinelebraran ti Ilocos Norte ti maika-105 a panagkasangay ni Gov. Ablan bayat a naideklara a non-working holidayiti sibubukel nga Ilocos Norte. Nangpangayed iti okasion ti presentasion dagiti clustered municipalities iti Ilocos Norte a nangipakitaanda kadagiti nagdalanan ti Ilocos Norte manipud idi agingga iti agdama.

Maysa pay a highlight ti Ablan Day ti pannakipaset ni Bise Pres. Jejomar Binay a nagbalin a kangrunaan nga agsarita iti dayta nga aldaw.

Iti panagbitla ti bise presidente, binigbigna ti kinabannuar ti sigud a gobernador idinto a kinunana a napintas a pagtuladan ti inaramid daytoy a panangisakripisio iti masakbayanna iti politika tapno magun-od dagiti tattao iti probinsiana ti kalkalikagumanda a wayawaya.

‘Aramidentayo koma met ti inaramid ni Ablan. Agkaykaysatayo amin a Filipino nga agturong iti nasayaat a direksion. Wen, sumangsangotayo iti adu a pannubok kas iti panaglablabes ken panagkunniber. Kasayaatan nga aramidentayo ti manglapped iti sulisog ti madagdagus a gin-awa. Tuladentayo ni Gov. Ablan a dina inawat ti diaya kenkuana dagiti Hapon ket kinaykayatna ti maidasay ngem ti agpaadipen kadagiti gangannaet,”  kinuna ti bise presidente.

Kinuna met ni sigud a First Lady Imelda Romualdez Marcos a saan laeng a mabigbig nga Ilokano ni Gov. Ablan no di ket maysa daytoy a nasionalista a kayatna a ti Pilipinas ket para laeng kadagiti Filipino.

“Napintas unay nga intayo lagipen dagiti bannuar ti pagilian a kas ken ni Gov. Ablan ta dagitoy ti agbalin nga inspirasion kadagiti agtutubo ken uray pay dagiti sumarsaruno a kaputotan,” kinuna ni Marcos.

“Call for the Youth: Unity and Prosperity for Ilocos Norte” ti nagbalin a tema ti Ablan Day ita a tawen.#