Gov. Ryan Luis Singson, kangrunaan a sangaili iti instolasion dagiti opisial ti ISAH

HONOLULU, Hawaii – Sangailien ti Ilocos Surian Association of Hawaii (ISAH) da Ilocos Sur Governor Ryan Singson iti instolasion ken re-apirmasionĀ  dagiti baro nga opisial ken direktor daytoy a gunglo babaen ti maysa a pangrabii ken programa kas paset ti panangrambakna iti maika-39 nga anibersariona sipud nabuangay idi Pebrero 27, 1977.

Manamnama a sumangpet ni Singson ditoy a siudad inton Agosto 13, kaduana ti kaingungotna a ni Patricia Savellano Singson, Provincial Tourism Officer Michaerl Ryan Astom ken ni Provincial Administrator Cara Michelle Peredo.

Kinuna ni ISAH President Danny Villaruz, ni Singson ti installing officer kadagiti nabutosan a kabarbaro nga opisial ti ISAH. Agtakem dagiti opisial manipud 2016 agingga iti 2018.

Kinuna met ni dati a Representative Felipe P. Abinsay, Jr., mamagbaga ti ISAH, a kabayatan ti kaadda ti grupo ni Singson iti Hawaii, ipromotda ti turismo, panagtagilako ken panagipuonan iti Ilocos Sur kas panagsaganada iti pannakagteng ti 200th nga anibersario ti Ilocos Sur a marambakan inton Pebruary 2, 2018.

Maysa pay kadagiti kangrunaan nga aktibidad iti pannakarambak ti maika-200 a tawen a panagwayas ti Ilocos Sur a kas probinsia ti pannakaangay ti Kannawidan Ylocos Festival of the Arts a pakaitampokan dagiti nabaknangĀ  a kultura ken arte, dagitiĀ  maipagpannakkel a produkto iti probinsia, partikular iti bagnet, longganisa ken dadduma a makan; ken napnuan historia a luglugar nangruna iti Vigan Heritage Village a pakasarakan kadagiti kadaanan a bato a balay a naipatakder idi tiempo pay la dagiti Kastila.

Madakamat ditoy a nagbalinen a kangrunaan a destinasion dagiti turista ti Vigan City, malaksid a karaman iti lista ti UNESCO a world heritage site ken maysa kadagiti pito a baro a pagsiddaawan a siudad iti lubong.

Nabuangay idi Pebrero 27, 1977, maysa itan ti ISAH kadagiti kangrunaan a gunglo dagiti annak ti Ilocos Sur ngem agnaeden iti Hawaii.#