Gov. Ryan, Vice Gov. Jerry ken Rep. DV, nailayon; Kristine Singson, baro a 2nd Dist. Rep.

VIGAN CITY — Pormalen nga improklamar ti Provincial Board of Canvassers dagiti amin a nangabak a kandidato kadagiti provincial positions ken kandidato a para kongresista iti Umuna ken Maikadua a Distrito ti Ilocos Sur sadiay Session Hall ti Sangguniang Panglalawigan, Provincial Capitol idi Mayo 15, 2019.

Naiproklamar a nangabak ni Gov. Ryan Luis Singson ti Bileg Party a nakaala iti kadagupan a botos a 290,140. Nakabalubalna ni Narvacan Mayor Zuriel Zaragoza ti PDP-Laban Party a nakagun-od iti 61,777 a botos.

Kadua ni Gobernador a naiplokamar ti ulitegna a nailayon a ni Vice Gov. Jerry Singson ti Bileg Party a nakaala iti 241,144 a botos. Inatiwna ni Atty. Anicka Zaragoza ti PDP-Laban Party a nakagun-od iti 95,966 a botos.

Naiproklamar pay ni 1st District Rep. Deogracias Victor Savellano a nailayon a Congressman ti Nacionalista Party a nakagun-od iti 76,165 a botos. Inabakna ni sigud a Cong. Ronald Singson, Independent candidate, a nakaala iti 73,012, ken maysa pay nga independiente a kandidato a ni Ben Aguilar nga addaan iti 1,165 a botos.

Naiproklamar metten dagiti nangabak ken nailayon a kandidato ti Bileg Party a kameng ti Sangguniang Panlalawigan iti Umuna Distrito: Mika Mendoza – umuna (108,448 votes); Efren Rafanan – maikadua (97,901 votes); Ronnie Rapanut – maikatlo (95,002 votes); Topeng Baterina – maikapat (84,815 votes); ken Constante Oandasan – maikalima (84,670 votes).

Naabak dagiti dua a kandidato a para SPM ti PDP Laban a da Mario Tugade (21,598 votes) ken Bernard Vicente (12,809 votes).

Improklamar pay ti Provincial Board of Canvasser a nangabak a kandidato a para 2nd District Representative ni Kristine Singson (Bileg Party) a nakaala iti 158,523 a botos. Inabakna ni Arthur Chua (PDP Laban) a nakagun-od iti 18,898 a botos.       

Naiproklamar pay dagiti nangabak a kandidato ti Bileg Party a para SPM iti Maikadua a Distrito: Jimboy Singson – umuna (152,734 votes); Pablito Sanidad Jr. – maikadua (121,584 votes); Gina Cordero – maikatlo (111,924 votes); Ben Maggay – maikapat (110,563 votes); ken Mildred Elaydo – maikalima (110,160 votes).

Naabak dagiti uppat a kandidato ti PDP Laban a para SPM: Waldimar Ping-ay (31,674 votes); Ceferino Gironella (29,550 votes); Anne Europa Morales (23,890 votes) ken Mediatrix Balucdang (15,024 votes.)

Maibasar iti Provincial Certificate of Canvass, dagiti kandidato a para senador a nakastrek iti Top 12 iti Ilocos Sur: Imee Marcos, Cynthia Villar, Grace Poe, Bong Go, Bato Dela Rosa, Pia Cayetano, Bong Revilla, Lito Lapid, Nancy Binay, Sonny Angara, Francis Tolentino ken JV Ejercito.

Ti Provincial Board of Canvassers ket buklen da Atty. Marino Salas, Provincial Election Officer kas Chairman; Provincial Prosecutor Robert Canosa kas Vice Chairman; ken DepEd Schools Div. Supt. Gemma Tacuycuy, Member-
Secretary. Mangrugi ti termino dagiti naiproklamar a nangabak inton tengnga ti aldaw ti Hunio 30, 2019..