Gown rental shop, natakawan

CANDON CITY – Mapapati a kuarta laeng ti puntiria dagiti mannanakaw idi sinerrekda ti maysa a rental shop sadiay Barangay San Jose ditoy siudad idi malem ti Oktubre 12.

Malaksid iti di ammo ti dagupna a kuarta a naikabil iti brown envelop, awanen ti sabali pay a natakaw iti shop ni Margie Segundo y Bernardo, 45, naasawaan, natibo iti Sabnangan, Luba, Abra ngem residenten iti Barangay San Jose ditoy siudad.

Segun ken ni Segundo, idi agarup 3:00 ti malem ti Oktubre 12, sakbay a pimmanaw iti shop, inkandadona ti steel gate sana inkabil ti tulbek iti divider iti abay ti gate.

Idi simmangpet ti balasang ni Segundo a ni Jesannie 18, naduktalanna a nakalukat ti kuarto dagiti dadakkelna, ken naiwarawara dagiti aruaten ken alikamenda iti uneg.

Nasarakan dagiti polis ti brown envelope a naggianan ti di pay ammo a kantidad a nakunes.

Mapapati a nakastrek dagiti mannanakaw iti shop babaen ti tulbek nga inkabil ti biktima iti divider iti asideg ti gate.#