Footer

Gr. III pupil, dinungpar ti motorsiklo

STA. LUCIA, Ilocos Sur. – Nagsagaba iti sugat iti nadumaduma a paset ti bagina ti maysa nga ubing nga agbasbasa iti primaria idi nadungpar iti motorsiklo idiay barangay Barangobong iti daytoy nga ili.

Nabigbig ti biktima a Jennifer dela Rosa, 8, Grade III pupil iti Santa Lucia North Central School, ken residente iti Barangay Barangobong ditoy idinto a nainaganan ti nakadungpar kenkuana a ni Dionisio Alay-ay, 28, ken residente iti isu met laeng a barangay.

Iti inisial nga inbestigasion ti polis, naammuan  a magmagna ti biktima agraman padana nga ubbing iti igid ti national highway idi bigla daytoy a bimmallasiw a puon ti nakadungparan kenkuana ti simmungad a motorsiklo.

Naitaray ti biktima ken ti nakadungpar kenkuana iti Santa Lucia District Hospital para iti pannakataming ti sugatda. Naiyalis kalpasanna ti biktima iti San Fernando La Union. #