Grade 2 pupils, nadungpar ti motorsiklo

STO. DOMINGO, Ilocos Sur – Dua nga ubbing nga agbasbasa iti primaria ti dinungpar ti motorsiklo iti kalsada a sakup ti Puerto Beach sadiay Barangay Naglaoaan idi agarup 1:00 ti malem ti Hunio 25.

Nainaganan dagiti biktima a da Rhenz Paul Rinton y Prodencio, 7, agbasbasa iti Grade 1, ken Zeier Vhinz Ascaño y Tabuso, 6, Grade 2 pupil, agpada a residente iti Barangay Naglaoaan, ditoy nga ili idinto a dagiti nangdungpar kadakuada ket nabigbig a ni Luciano Tabios, Jr. y Lumamba, 18, 2nd year college student, residente iti Barangay Calay-ab, ditoy met laeng nga ili.

Naammuan iti report nga agdaldaliasat nga agpadaya iti nadakamat a lugar ti motorsiklo a minaneho ni Tabios, kalubbonna ni Jhonel Cris Asuncion y Maniego, 16, 1st year college student, kalugaranna met laeng, idi kellaat a bimmallasiw iti kalsada da Rinton ken Ascaño a puon ti nakadungparan ti lugan kadakuada.

Nagsagrap dagiti dua iti dunor iti ulo ken nadumaduma a paset ti bagida ket naitarayda iti Metro Vigan Cooperative Hospital, Bantay, Ilocos Sur.#