MAGSINGAL, Ilocos Sur – Awanen ti biag ti maysa a barito idi maduktalan iti uneg ti bunkhouse iti kataltalonan ti Barangay Panay Sur, ditoy nga ili idi rabii ti Oktubre 3.

Nupay naitaray ni Daniel Acena y Ragsak, 15, awanan asawa, Grade 9, ken residente iti nadakamat a barangay, iti Magsingal District Hospital, naideklara a dead on arrival idi maidanon iti balay-pagagasan.

Idi agarup 7:30 ti sardam ti nadakamat a petsa nga ipapan ni Rowena Acena y Tabios, 36, iti talon a bambantayan ni lakayna kas caretaker, nadatnganna nga awanen ti biag ti anakna iti uneg ti bunkhouse a nakaiggem iti barut ti radiona iti asideg ti outlet.

Masuspetsa a nakoriente ti biktima idi insaksakna ti plug ti barut ti radiona iti outlet.#