STO. DOMINGO, Ilocos Sur – Di pay nabirokan ti maysa nga ubing dua nga aldaw kalpasan a naipisok iti lipnok ti basura iti Barangay Sto. Tomas ditoy nga ili idi Oktubre 25.
Nupay kasta, di pay napukawan ti namnama dagiti nagannak ken ni Patrick Adrian Madriaga y Pamo, 6, Grade I pupil ti Sto. Tomas Elementary School a mabirokanda pay ti bangkay ti anakda iti ummong dagiti basura.
Segun iti inisial a panagimbestiga dagiti polis, aggawiden da Patrick, kaduana ti kabsatna a ni Paul Angelo Madriaga, 10, ken da Jervin Tuzon y Pamo, 9, ken John Carl Medina y Tabalan, agpapada a kalugaranna, idi agarup 3:20 iti malem ti Oktubre 25 ket idi lumabasda iti pagbasuraan, nakita ti biktima ti maysa a bola iti pagbasuraan.
Napan innala ti ubing ti bola ngem nanabsuok laengen a nagpauneg agsipud ta nagkadan-awan gayam ti nalawa nga abut.
Inarayat dagiti kakaduana ket nanabsuokda met iti danum. Nupay kasta, nakapaigid met laeng dagitoy ta ammoda ti aglangoy.
Iti pannakaisurat daytoy ket saan pay a nabirokan ti bangkay ti ubing a mapapati a nalmesen iti daytoy a kabayagna.#