Grade I pupil, silver medalist iti chess tournament sadiay Singapore

CANDON CITY. Pinaneknekan ti maysa nga innem ti tawenna nga ubing a babai a kabaelanna met nga ipaayan iti dayaw ti pagilianna babaen iti chess.
Inyalat ni Mezel Angela Gadut, Grade 1 pupil iti Parioc East Elementary School ti silver medal iti Asean Age Group Chess championship a naangay iti Singapore itay napan a bulan.
Kinuna ni Sonny Gadut, ama ni Angela, a nakakualipika ti anakna idiay probinsia ti Isabela a nakapilianna kas maysa kadagiti pannakabagi ti pagilian iti salip iti chess iti Singapore. Ni Sonny ti nagserbi a coach ni Angela.

Kinuna ni Sonny a nakisalsalip metten iti chess iti Ilocos Region Athletic Association ti inauna a kabsat ni Angela.

Kinuyog ni Sonny ti anakna a nagturong iti opisina da Governor Ryan Singson ken Candon City Mayor Ericson Singson tapno agyamanda iti suporta dagitoy iti pannakisalip ni Angela iti Singapore.#