Grade IV pupil, nalmes

SAN ESTEBAN, Ilocos Sur – Nalmes ti maysa Grade IV pupil gapu iti panangpadasna a mangalaw iti kaklasena a dina ammo ti aglangoy.

Nainaganan ti biktima a maysa a Marie Cris Manalo y Galimba, 9, Grade IV pupil iti iti Ansad Elementary School, ken residente iti Barangay Ansad.

Naammuan iti report a nagturong da Manalo ken tallo pay a kakaduana iti waig tapno mapanda agdigos idi agarup 9:00 ti bigat ti Septiembre 28.

Mapapati nga induron ni Manalo ti maysa a lalaki a kaklasena iti waig ngem saan nga ammo daytoy ti aglangoy isu a pinadas nga inalaw ti biktima a puon ti nakalmesanna.

Inalaw dagiti immarayat a mannalon ti biktima sada inikkan iti first aid ngem daksanggasat ta idi maidanon iti Reyes Hospital, awanen ti biagna.#