Grade V nga ubing, nalmes iti karayan

BANTAY, Ilocos Sur – No nagpakada koma daytoy nga ubing, mabalin a di koma nadesgrasia ket sibibiag koma pay.

Naammuan iti report manipud iti polis ditoy a nalmes ni Mark James Mendoza, 11, Grade V pupil iti Tay-ac Elementary School bayat ti panagdidigosda nga aggagayyem iti karayan ti Barangay Tay-ac idi malem ti Agosto 9, 2014.

Segun iti report, saan a nagpakada ni Mendoza iti lelongna a kimmuyog kada Melvin Laurente, 12, ken John Lloyd Marzan, 7, a napan nagbirok iti lawwalawwa.

Idi addadan iti karayan, nagdigos da Laurente ken Mendoza ket mapapati a naikaglis ni Mendoza a puon ti a pannakatinnagna iti nauneg a paset ti karayan a nagresulta iti pannakalmesna.

Nagpaarayat ni Laurente idi saanna a naisalakan ti gayyemna.

Idi naalaw ti biktima, naitaray iti Gabriela Silang General Hospital ngem indeklara ti doktor a nangtaming kenkuana nga awanen ti biagna.#