Footer

Granada, naisuko

MAGSINGAL, Ilocos Sur  – Maysa a granada ti insuko dagiti barangay officials ti Macatcatud ditoy nga ili iti polis idi tengnga ti aldaw ti Hulio 12.

Personal a napan da Barangay Captain Efren Fortuguez Soliven ken dagiti kagawadna iti police station ditoy nga ili ket insukoda ti maysa a hand grenade a mapapati a kukua ti maysa a Jaime Ramos a kalugaranda.

Kabayatanna, maysa a daan a bomba ti insuko ti maysa a residente ti Barangay Amguid, Candon City iti hepe ti polis ti nasao a siudad.

Naammuan ken ni Celin Galinato, aggatgatang iti landok, natakuatanna nga aglatlati a bomba gayam ti inlako kenkuana ti di nainaganan a tao isu nga insukona daytoy iti polis.#