Granada, nasarakan iti likud ti balay

TAGUDIN, Ilocos Sur – Maysa a granada ti nasarakan iti likud ti balay ti maysa a residente sadiay Barangay Cabaroan, ditoy nga ili iti agsapa ti Abril 21.

Segun iti report, bayat ti ilalabas ni Jojo Lanuria, 20, residente iti nadakamat a barangay, iti likud ti balay ti lolana a ni Carlina Lanuria, nasikkarudna ti maysa a plastic a pinggan a nagaburan ti pasetna iti daga a puon ti nakaidalebanna.

Idi kitaenna no ania ti nasikkarudna, naduktalanna laengen ti maysa a granada a naikabil iti PVC pipe.

Dagus a nagpatulong dagiti barangay officials iti kapolisan a nangayab met iti Explosive Ordnance Disposal tapno alaenda ti granada.

Naipan ti granada a nadeskribir nga M33 iti EOD para iti umisu a disposision.#