Granada, nasukalan iti Gabriela Silang Hospital

VIGAN CITY – Naalarma dagiti agpapaay iti Gabriela Silang General Hospital kalpasan a maysa a granada ti naduktalan iti comfort room ti nasao a balay-pagagasan idi agsapa ti Disiembre 23.

Dagus a nagresponde dagiti polis nga indauluan ni OIC, Police Supt. Jugith del Prado apaman nga inreport ni Jay-r Alacaden, security guard, nga adda nasarakan a hand grenade iti likudan ti toilet bowl iti umuna a kadsaaran ti GSGH idi agarup 8:00 ti bigat ti nadakamat nga aldaw.

Segun iti polis, idi agarup 7:45 ti bigat ti nadakamat nga aldaw, nasukalan ni Erlinda Cabotaje y Tabarangao, 59, administrative aide ti ospital, ti nangisit a pouch a naikabil iti likud ti bowl ket idi sinukimatna, nakitana a maysa a granada ti linaonna.

Inreport ni Cabotaje ti nasukalanna ken ni Dr. Jun Togas, Medical Officer, sa iti guardia a dagus met a nangireport iti insidente iti polis.

Nakikoordinar dagiti polis iti EOD ti Ilocos Sur Provincial Police Office ket impaimada kadakuada ti maysa a MK2 fragmentation hand grenade.

Nangiwayat pay ti EOD iti clearing operation, kaduada dagiti polis Vigan.#