Groundbreaking ti SB session hall, naangay

CABUGAO, Ilocos Sur – Naangay itay Agosto 21 ti ground breaking ceremony ti pannakaipatakder ti Sangguniang Bayan session hall a pagbuligan a pinunduan ti gobierno probinsial ken ti lokal a gobierno ditoy.

Mismo a ni Gov. Ryan Singson ti naisangayan a sangaili iti seremonia nga inimatangan dagiti municipal ken barangay officials nga indauluan ni Mayor Edgardo S. Cobangbang, Jr., dagiti hepe dagiti nadumaduma nga ahensia ken empleado iti munisipio.

Kinuna ni Cobangbang a P4.6 million ti inted ti gobierno probinsial a pondo para iti pannakaipatakder ti SB Session Hall idinto a P2 million ti counterpart manipud iti lokal a gobierno nga idadauluanna.

Kinuna ni Cobangbang nga addanto pangopisinaan dagiti konsehal iti maikadua a kadsaaran ti session hall tapno aginaldaw a mapan dagiti konsehal para iti nasaysayaat a panangipaayda iti serbisioda kadagiti kalugaranda.

Kinunana pay nga addanto galeria a paggianan dagiti umili tapno makitada ti panagtrahabo dagiti konsehal bayat ti panagsessionda.#