Grupo dagiti mangngalap, sumaruno a prioridad ti gobierno probinsial

BANTAY, Ilocos Sur – Impalgak ni Provincial Agriculture Officer Teofilo Quintal nga impasingked kenkuana ni Gov. Ryan Singson a sumublat a tamingenna dagiti mangngalap apaman a sumangpet ti bingay ti probinsia iti excise tax ti tabako kalpasan nga indanonna ti saning-i dagiti mangngalap no kaano met a tulongan ida ti gobernador.

Segun ken ni Quintal, saning-i dagiti mangngalap nga adda Ryan rice, Ryan corn, ket kaanonto met nga adda Ryan fish a maibunong kadakuada.

Saan pay a simmangpet ti bingay ti probinsia iti RA 7171 agsipud ta mapapati a “maip-ipit” ti pannakaruk-at ti pondo daytoy a linteg a pagnanaaran dagiti tobacco producing provinces a pakaibilangan ti Ilocos Sur, La Union, Pangasinan ken Ilocos Norte.

Kinuna ni Quintal nga iti daytoy a tawen, idinto a 21 nga ili pay laeng ti napanan ti outreach program ti gobierno probinsial, nakaiwarasen iti 48,168 bags ti complete fertilizer kadagiti mannalon iti probinsia.

Sabali laeng dagiti kuliglig, traktora, hose, sheller ken dadduma pay a ramit-talon, banag nga ap-apalan dagiti mangngalap iti probinsia.

Nupay kasta, kinuna ni Quintal a binilinen ni Singson ti panangukkonda kadagiti resolusion dagiti grupo dagiti mangngalap mainaig kadagiti kasapulanda tapno dagitoy ti maipaayan iti prioridad apaman a sumangpet ti pondo manipud iti RA 7171.#