Grupo ti babbaro, kinabil sabali a grupo

SANTA, Ilocos Sur – Uppat a babbaro ti nakursonadaan a kinabil ti sabali a grupo ti lallaki a pakairamanan ti dua a menor de edad sadiay Barangay Labut Norte, idi rabii ti Oktubre 11.

Nainaganan dagiti biktima a da Dennis Reolalas y Polinio, 19; Mark Edison Raboy y Aguinir, 18; Johmel Raboy y Ragucos, 17; ken Rovic Donato y Rapisura, 16, residenteda amin iti Barangay Pantay Fatima,Vigan City, Ilocos Sur.

Nabigbig dagiti kimmabil kadakuada a da Jomarie Corpuz, 20; Jingboy de Peralta, 20; Jonico Corpuz, 18, ken dua a suspek a di nainaganan ta menor de edadda; residenteda amin iti Barangay Pasungol, Santa, Ilocos Sur.

Iti panagimbestiga ti polis, nabtakan ti pilid ti Suzuki Shogun a motorsiklo dagiti biktima ket uk-ukodenda ti luganda a nagbirok iti talier idi mapapati nga awan rason a dimmarup ken kinabil ida dagiti suspek.

Mapapati a binurak pay dagiti suspek ti headlight ti motorsiklo.

Naitaray dagiti biktima iti Central Ilocos Sur District Hospital para iti pannakaagas dagiti dunorda.

Agtultuloy ti panagimbestiga ti kapolisan ditoy mainaig iti nasao nga insidente.#