Grupo ti barangay kagawad, naireport a nanglugob

VIGAN CITY – Nagpulong iti polis ti maysa a biktima iti pannakalugob babaen ti grupo ti maysa a barangay kagawad gapu iti riri iti sugal iti natayan sadiay Barangay Tamag ditoy siudad idi agsapa ti Oktubre 29.

Personal a nagpulong iti polis ni Denver Navarro y Bajog, 22, baro, ken residente iti nadakamat a barangay, a kinabil ti grupo ti lallaki a pakaibilangan ni Barangay Kagawad Rodrigo Rabang, maysa nga agnagan iti Ungkol ken Paiste a mapapati a nagramut iti riri iti daduan a napasamak idi agarup 12:00 ti tengnga ti rabii ti Oktubre 29.

Segun ken ni Navarro, bayat ti panagay-ayamda iti dado, naparnuay ti dida panagkinnaawatan iti maysa a Dexter.

Kinompronta ni Rabang ni Dexter ket nagresulta daytoy iti panagdinnisnog dagiti dua.

Mapapati a ni Navarro ti nagpupudotan ni Rabang ket idi timmaray ni Navarro, kinamat ti grupo ni Rabang sada linugoban a nagsagrapan ti biktima iti sugat iti rupana.#