Grupo ti drug surrenderees, kinabilda nakursonadaanda a grupo ti lalaki

VIGAN CITY – Nakursonadaan ti grupo ti dua a drug pernalities ti sabali a grupo bayat ti panagginomda iti maysa a bar ditoy siudad a nagresulta iti panangkabil dagiti suspek kadagiti biktima idi nariwet nga agsapa ti Oktubre 2.

Nabigbig dagiti suspek a da Felicisimo Realubin Jr., ken Eugene Rigunay, agpada a drug surrenderer ken residente iti San Vicente, Ilocos Sur. Saan pay nga ammo dagiti tallo a kaduada.

Nainaganan met dagiti biktima a da Paul Jansen Pugal y Villalobos, 22; Mark Molina y Arce, 22; Arlan Pascua y Espino; Dondey Ferido y Figuerres; ken Delon Raquepo y Bermudez, residenteda amin iti Brgy. Capangpangan, Vigan City, Ilocos Sur.

Iti panagimbestiga dagiti polis, nagsina ti lamisaan a naggiinoman dagiti suspek ken dagiti biktima iti Legacy Bar a masarakan iti Barangay I, Vigan City ngem mapapati a nakursunadaan ti grupo da Realubin ken Rigunay ti grupo dagiti taga-Capangpangan, Vigan.

Immuna a rimmuar iti bar ti grupo da Realubin ken Rigunay ket mapapati nga inurayda ti grupo dagiti biktima.

Idi rimmuar dagiti biktima, immasideg dagiti suspek sada kinabil dagiti biktima a nakadunoran ti rupa dagitoy.

Di panagkikinnaawatan ti nailanad iti journal a motibo ti pannakakabil dagiti biktima ngem saan a nalawag no ania ti dida nagkikinnaawatan.

Kabayatanna, maysa a menor de edad ti mapapati a puon ti riribuk iti nagbaetan ti dua a grupo iti ruar ti maysa a videoke bar sadiay Sitio Seng-aben, Barangay Cabaroan, San Emilio idi agarup 11:30 ti rabii ti Oktubre 2.

Nainbolbar iti nasao a riribuk ti grupo da Jerry Bong Lantes y Saboquel, 28, baro, residente iti Brgy. Baang Cabaroan; Efren Mogaey; Dan Mariano, naasawaan ken residente iti Singson Cabaroan; Reynald Galusan y Ventura, 44 years, baro, ken residente iti Baang Cabaroan, San Emilio ken ti grupo da Marcelo Almazan y Antolin, 38, naasawaan ken Darwin Almazan y Antolin, 35, naasawaan, agpada a residente iti Brgy. Dirdireg, Burgos; Bernard Manangguete y Agamata, 31, naasawaan, residente iti Banaoang, Bantay; Dominador Barrairo y Mendoza, 35, baro, residente iti Poblacion Sur, Sta. Maria. Drayber amin dagitoy ti WDM Construction.

Segun iti report, bayat ti panaggiinom ti dua a grupo iti Gina’s Videoke Bar, maysa a menor de edad a kadua da Jerry Bong a nabigbig laeng a kas “Manganop” ti napan iti sanguanan ti lamisaan da Dominador Barrairo sa sipapalangguad a nanguksob iti tisirtna.

Napan ni Dan Mariano iti lamisaan da Dominador sana kinuna: “Baanyo datan ket ubing.”

Di mabayag, binayadan da Dominador ti nainomda sada pimmanaw.

Madamdama, napan met nagbayad da Jerry Bong iti nainomda sada rimmuaren.

Mapapati nga inasitgan ni Jerry Bong ti grupo da Dominador tapno agpadispensar ngem sabali ti nagawatan dagitoy ket sinulongda ni Jerry Bong a nakadunoran ti lapayag ken ulona.

Nakita ni Efren Mogaey ti napasamak ket napanna tinulongan ni Jerry Bong ngem minalo ni Bernard Manannguete ni Mogaey iti landok a nakaparparan ti tulang iti makannigid nga imana.

Naitaray da Jerry Bong ken Mogaey iti Candon General Hospital, Candon City para iti pannakaagasda idinto a naikustodia dagiti suspek ken ti landok a naimalo ken ni Mogaey.

Saan a nailanad iti blotter no apay a napalubosan ti maysa a menor de edad nga agginom iti videoke bar iti kasta nga oras ti rabii.#