Footer

Grupo ti mannanakaw, inaresto ti polis-Vigan

VIGAN CITY – Nanabtuog iti ima ti linteg ti maysa a grupo dagiti mannanakaw a mapapati nga akingapuanan dagiti nagsasaruno a panagtakaw iti Caoayan, Bantay ken ditoy a siudad kalpasan a natiliw ti tallo a kameng ti grupo idi agarup 2:30 ti parbangon ti Marso 4 iti compound ti Gabriela Silang General Hospital ditoy.

Nakasuanen dagiti suspetsa ngem manamnama a manayonan pay gapu iti panagsangpet dagiti dadduma a biktima ti panagtakaw.

Inaresto dagiti polis da Rollie Casigan 22, naasawaan, agnaed iti Km. 6, La Trinidad, Benguet; Raymund Dulaican, 27, baro, residente iti Tadian, Mt. Province, drayber iti Tamaraw FX; ken Randy Palqui, 21, agnaed iti La Trinidad, Benguet. Nakalibas ti maysa a kaduada.

Nakumpiska dagiti polis iti uneg ti luganda a Tamaraw FX dagiti nadumaduma a ramit-komunikasion kas iti selpon, laptop, DVD player, ken maysa a box a naglaon iti aramienta, bikal ken pigket.

Mapapati a nagpakni dagiti mannanakaw iti compound ti ospital tapno palabsenda ti rabii kalpasan ti insayangkatda a panagtakaw iti pagtaengan dagiti ag-Cuyo iti Caoayan, Ilocos Sur.#