Footer

GSGHs Trust Fund, nakiddaw a mabukel

VIGAN CITY – Kiniddaw dagiti empleado ti Gabriela Silang General Hospital (GSGH) a mabukel ti trust fund para iti operasion ti nasao nga ospital.

Daytoy met ti linaon ti resolusion a pinutar ni Bokal Jeremias “Jerry” Singson, chairman ti committee on health, sanitation and social services, a kas sungbatna iti surat ni GSGH acting Chief ken Provincial Health Officer, Dr. Carmeliza T. Singson.

Segun iti pangulo ti nasao nga ospital, kasapulan a mabukel ti kidkiddawenda a mailatang a trust fund tapno daytoy ti madadaan a pangalaanda iti busbosenda para kadagiti ramit a kasapulanda ken dadduma pay a transaksion ken paggastuanda ditoy.

Kinuna pay ni Dra. Singson a paset ti nadakamat a trust fund ti mailatang a gatad a madadaan nga aramatenda no dumteng ti emerhensia a panagkasapulanda iti ospital.

“Sabali laeng daydiay addan a nailatang ken nakasagana a pundo. Narigrigat ken nabaybayag no daytay sakami la agkiddaw no kasdiay a kasapulanmi,” panangilawlawag pay ti doktora iti suratna.

Naaprobaran ti resolusion a nakaipalaonan ti nadakamat a kiddaw iti maikadua ken pinalen a pannakaibasana.