GSP Regional Encampment, naangay iti Cabugao

CABUGAO, Ilocos Sur – Nasurok dua ribu a girl scouts ti nakipartisipar iti 55th Senior and 43rd Junior Encampment iti Barangay Pug-os ditoy nga ili itay Disiembre 10-13.

Ni Gov. Ryan Singson ti kangrunaan a sangaili iti panaglukat ti encampment itay Disiembre 10.

Nagpartisipar iti encampment dagiti sangapulo ken innem a councils ti GSP Northern Luzon Region manipud iti 15 a probinsia a pakaibilangan ti Cagayan, Isabela, Quirino, Nueva Vizcaya; Pangasinan; La Union; Abra, Baguio, Batanes, Benguet, Dagupan, Ifugao, Ilocos Norte-Laoag, Ilocos Sur, Kalinga-Apayao, ken ti Mountain Province.

Nagtitinnulong a nangtagiben iti urnos ken talna iti pagkampuan dagiti kameng ti municipal police station ken SWAT team, MDRRMC-WASAR team iti panangidaulo ni Engr. Nestor B. Somera, kamkameng ti Public Safety Office, dagiti kameng ti BPATS/barangay tanod iti panangidaulo ni Pug-os Barangay Captain Arnold Yangat.

Ti tema ti encampment itoy a tawen: “Connect… Create… Change.”#