Guardia, nakumpiskaan iti paltog iti restobar

VIGAN CITY – Ammo la ngaruden daytoy a guardia a maiparit ti agikuyog iti armas iti pagginoman, nagtagipaltog latta a simrek iti maysa a restobar tapno uminom. Resulta, naitimbre iti kapolisanĀ  malaksid a nakumpiska ti paltogna, posible pay a makasuan.

Segun iti report, naalarma dagiti kustomer idi napan naginom ni Euds John Tica del Mondo, 21, naasawaan, security guard ken residente iti Sto. Domingo, iti Trelliā€™s Restobar ta makitkitada ti naka-holster a paltog daytoy iti makannawan a siketna.

Inreport ti manadier ti restobar ni Tica kadagiti agpatpatrolia a intimbre met a dagus dagitoy iti police station.

Nagresponde dagiti polis ketĀ  kinumpiskada ti paltog ni Tica idi awan ti maipakita daytoy a lisensia ken permit nga agikuyog iti paltog iti ruar.

Naikustodia ni Tica iti police station para iti umisu a dokumentasion idinto a naipaima ti paltogna iti Provincial Crime Laboratory Office para iti ballistic examination.#