CERVANTES, Ilocos Sur – Agkurang ti inumenda ket napanda gimmatang iti arak iti ruar ngem daytoy metten ti nakapaltogan ti maysa a baro a puon ti nakatayanna.
Natay nga insigida ni Lewelyn Bonuan, 32, baro, residente iti Barangay Rosario ditoy kalpasan a pinaltogan ti di pay am-ammo a lalaki iti asideg ti national highway a saklaw ti nasao a barangay.
Naammuan iti report a naginom da Bonuan ken ni Jun Pugasen iti pagtaengan ti maysa nga agnagan Joseph ket idi naibbus ti inumenda, rimmuarda a napan gimmatang iti arak iti tianggi nga asideg iti kalsada.
Bayat a gumatgatangda, immasideg ti suspetsa sana pinaltogan ti biktima a nagsagrapan daytoy iti sugat iti ngatuen ti bibig ken barukongna ket natay a dagus.
Cal. 9 mm ti naaramat iti krimen kas maibasar iti kapsula a nasarakan dagiti polis iti crime scene.
Naglibas ti suspetsa kalpasan ti pammapatay.#