Gun-for-hire, arestado iti Bantay, Ilocos Sur

BANTAY, Ilocos Sur – Maysa a miembro ti mapagbutbutngan a gun-for-hire group ti nakemmeg iti maysa a buy-bust operation nga insayangkat dagiti police operatives iti Brgy. Guimod, Bantay, Ilocos Sur idi agsapa ti Enero 23, daytoy a tawen.

Nainaganan ti suspek a ni Marvin Y. Macugay, 30, awanan asawa ken agnaed iti Brgy. Sta. Cruz, Sinait, Ilocos Sur.

Segun iti report, maysa ni Macugay a Level 2 High Value Target ti PNP, ken mapapati a miembro ti Igne-Rosete Gun-for-hire nga agdakdakiwas iti Rehion 1 ken NCR.

Nakemmeg ni Macugay iti nagtipon nga operatiba ti CIDG Ilocos Sur, Regional Intelligence Division ti PRO1, Ilocos Sur Hi-way Patrol Group, Provincial Intelligence Board ken Bantay MPS. Naalaan ti suspek iti paltik, bala, granada ken buy-bust money.

Addan ni Makugay iti ikut ti CIDG Ilocos Sur para iti dokumentasion ken umno a disposision. (Tawid News Team, base iti report ti PNP PRO1 PIO)