Gun for hire, nakipinnaltog kadagiti polis mangaresto kenkuana

CABUGAO, Ilocos Sur – Napaay dagiti nagtitipon nga elemento ti kapolisan a mangaresto iti maysa a drug personality ken kameng iti maysa a gun-for-hire a grupo ta nakipinnaltog daytoy sa naglibas.

Mapapati a natunogan ni Sinco ti OPLAN PAGLALANSAG OMEGA ken OPLAN BIG BERTHA nga inwayat ti nagtitipon nga elemento ti CIDG Ilocos Sur, Cabugao PS, PAIDSOTG, 103rd Maritime Group, HPG-1, ISPPSC, PIB, ISPPO ken PDEA iti panangidaulo ni Police Chief Inspector Richard Duguies Palay para iti pannakaaresto ni Roger Sinco iti pagtaenganna sadiay Sitio Padual, Barangay Pug-os, Cabugao, Ilocos Sur.

Imet dagiti arresting operatives ti warrant of arrest nga inyisio ni Judge Policarpio P. Martinez ti RTC Branch 71, Candon City maikontra ken ni Sinco a sumangsango iti kaso a murder.

Adda kadua ni Sinco nga uppat a lalaki ket mapapati a madamada a mangiwaywayat iti transaksion iti droga idi mapan arestaren dagiti polis.

Awan ti naireport a casualty iti shootout.

Nupay kasta, nabati da Sinco dagiti sumaganad: maysa a colt M16 Armalite Rifle, narasrasan ti serial numberna; 2 short magazine assembly para M16 rifle; 37 a bala para Cal. 5.56; maysa a Federal Cal. 45 pistol bearing Serial No. 507722; maysa a magazine assembly para Cal. 45 pistol; 8 a live ammunition of Cal. 45; 3 a single motorcycles; maysa a dakkel a plastic pack naglaon iti white crystalline substance a masuspetsa a shabu; 7 bassit agingga iti kalainganna kadakkel heat sealed transparent plastic sachets a nagkarga iti mapapati a shabu; 2 weighing scale; ken drug paraphernalia.

Mapattapatta nga agdagsen amin dagiti nakumpiska a masuspetsa a droga iti 100 grams nga agbalor iti P300,000.00.

Ni Sinco ti nabatbati laengen iti Edgar Sinco Group nga agiwaywayat iti gun-for-hire ken illegal drugs nga aktibidad iti Ilocos Sur ken Ilocos Norte.
Karaman pay ni Sinco iti target list ti PDEA RO1 kadagiti drug personalities iti Ilocos Sur.#