Gunglo dagiti mannalon, matulongan nga agrehistro iti SEC

CABUGAO, Ilocos Sur – Kas paset ti programa iti agrikultura ditoy, mairehistro dagiti gunglo dagiti mannalon iti Securities and Exchange Commission tapno masagrapda dagiti pagsayaatan nga ipaay dagiti nadumaduma nga ahensia ti turay.

Segun ken ni Ester Aguimbag, municipal technologist ken mangtartarabay kadagiti organisasion ti mannalon iti barangay, mabalin nga alternatibo a pagrehistruan dagiti non-registered organization ti Departament of Labor and Employment (DOLE) tapno naan-anay ti pannakabigbigda ken maaddaanda iti juridical identity a kas gunglo.

Addan pito nga asosasion a naiparehistro wenno mairerehistro  iti DOLE a pakaibilangan ti  Cabugao Mango Growers  and Farmers Multipurpose Association; Daclapan Farmers’ Association, Sagayaden FA, Quezon FA, Sabang FA (ongoing), Western Salomague Fishermen and Vendors’ Association.

Kinuna ti municipal technologist a kangrunaan a kitkitaen ti opisinada no ar-aramiden met laeng dagiti registered organizations ti annongenda nga agreport iti SEC iti kada tawen nangruna kadagiti book of accounts a pakaammuan iti pinansial a kasasaad dagitoy a gunglo.

Innayon ni Aguimbag a kaaduan a makagapu iti pannakarebokar ti rehistrasion ti organisasion ti panagliway dagiti opisial nga agidatag kadagiti report a kasapulan nga itedda iti tinawen.

No marebokar ti rehistrasion ti maysa a gunglo, problemanto dagiti sumaruno nga agopisial nga ipabaro ti pakabuklan ti articles of incorporation ken constitution and by-lawsda, inyunay-unay ni Aguimbag.

Kinuna ni Aguimbag a mareorganisar uray dagiti gunglo a nakarehistro no saanen nga aktibo dagiti opisialda ken kas maibasar iti probision ti pannakaamendar ti asosasion a pakaibilangan dagiti rural improvement clubs (RICs), farmers’ organizations ken mabubuangay nga organisasion a maisalinong iti DA-LGU.#