Gunglo dagiti natengan, agangkaten iti lakoda

CABUGAO, Ilocos Sur  –  Insingasing ti dadaulo ti Cabugao Vegetable Growers and Producers Association agpermit amin dagiti agangkat ken aggatang iti nateng iti bagsakan ditoy nga ili tapno patas ti kumpetision ken dumakkel ti pamastrekan ti ili.

Kinuna ni CVGPA President Armando Azcueta a no agpermit amin dagiti agangkat ken aggatang kadagiti nateng iti bagsakan ti ili, dumakkel ti mapastrek ti munisipio nga agsublinto met la kadagiti mannalon babaen iti nasaysayaat a serbisio.

Kinuna ni Azcyeta a rinugian itay nabiit ti gunglo nga idauluanna ti agangkat kadagiti binulto a natnateng nga ilakoda sadiay Urdaneta, Pangasinan ken Balintawak.

Innayonna nga umabot pay iti pito a tonelada ti angkatenda a natnateng ket ar-aramatenda ti soft loan nga inted ti lokal a gobierno nga idadauluan ni Mayor Edgardo S. Cobangbang, Jr. a pagkapitalda a vegetable growers.

Ti agrikultura ti maysa kadagiti prioridad a programa ni Cobangbang para iti pannakapadur-as ti ekonomia ti ilina.#