Footer

BANNER: Guns for hire agiwaywayat pammapatay iti Ilocos Sur?

CAMP ELPIDIO QUIRINO, BANTAY, Ilocos Sur – Adda grupo ti gun for hire nga aggargaraw ditoy probinsia?

Segun ken ni Police Superintendent Maximo Taclas, Provincial Chief Investigation and Detection Management Branch ti Provincial Police Office, posible nga adda grupo dagiti matangtangdanan a pumatay nga agdakdakiwas iti Ilocos Sur ngem taga-sabali a probinsia ket daytoy ti nainbolbar  kadagiti shooting incidents iti probinsia a pakairamanan ti pannakapapatay ni Bureau of Fire Protection Marshall SFO3 Teddy Fariñas itay nabiit.

Kinuna ni Taclas nga umarngi ti modus operandi ti mapapati a nangpatay ken ni Fariñas iti sumagmamano a shooting incidents iti kallabes isu’t gapuna a kiniddawda iti crime laboratory iti rehion ti ballistic cross matching ti kapsula ken slug a nasarakan iti crime scene kadagiti kapsula ken bala a narekobre dagiti otoridad kadagiti kallabes a pammapatay a naisayangkat iti probinsia.

“No ti trabaho ti maysa a tao ket agpappapatay, posible nga isu met la nga isu a paltog ti usarenna,” kinuna ni Taclas bayat ti interbio kenkuana ni Jun Ramos iti programa daytoy a Barangay Commando Brigada a naipatangatang iti DWRS idi Hunio 15.

Kinuna pay ti police officer a natured dagiti nagisayangkat iti pammapatay a saan a nagaramat iti abbong iti rupada ta saan ida a mailasin dagiti saksi iti krimen agsipud ta saanda a taga-Ilocos Sur.

Iti umuna a lawas ti Hunio, nagsasaruno dagiti pammapatay a naisayangkat ditoy probinsia a pakairamanan ti pannakapapatay idi Hunio 2 ni John Louie Reotutar y Rapada, 25, inhiniero ti DPWH; ni Renato Yaba, Jr. y Cadimas, 32, iti Barangay Binacud, Sinait, idi rabii ti Hunio 4, ken ni Fariñas idi Hunio 11.

Adda ni Reotutar iti uneg ti Venini Store iti Barangay VIII, Vigan City, kaduana ti live-in partnerna, idi pinaltogan iti namitlo a daras ti maysa a di nabigbig a lalaki a nakaaruat iti striped polo shirt, maong shorts ken bull cap.

Awanen ti biag ni Reotutar idi maidanon iti Gabriela Silang General Hospital gapu iti sugatna iti ulo.

Nagnagna a pimmanaw a nagpaamianan iti Del Pilar Street ti kriminal kalpasan ti pammaltog. Mapapati nga adda agur-ray a lugan ken kaduana a nagpaay a lookout iti pannakaisayangkat ti pammaltog.

Nakarekobre dagiti polis iti tallo a kapsula ken maysa a buli iti crime scene.

Pinaltogan dagiti armado a tattao a riding in tandem ni Yaba bayat ti panagdaliasat ti traysikel a minanehona iti kalsada a sakup ti Barangay Binacud, kaduana ti asawana a ni Primalyn, ken dagiti dadakkelna a da Renato, Sr. ken Carmelita.

Dagus a nagudas ni Yaba gapu iti dunorna iti makannigid a pispisna.

Mapapati a cal. 45 ti inaramat dagiti kriminal kas maibasar iti maysa a kapsula a nasarakan dagiti inbestigador iti nakapasamakan ti pammaltog.

Kabayatanna, pinaltogan dagiti armado a tattao a nakalugan iti Honda XRM ken Marked Blaze ni Fariñas bayat ti panagdaliasat ti luganna a nalabaga a Toyota Corolla nga agpaabagatan a direksion iti kalsada nasional, partikular ti akin-amianan a murdong ti Parsua Bridge iti Barangay Barbarit, Magsingal, Ilocos Sur.

Immuna a naitaray ni Fariñas iti Magsingal District Hospital sa naiyakar iti Metro Vigan Cooperative Hospital no sadino a naideklara a dead on arrival gapu iti sinagrapna a sugat iti barukongna.

Nakarekobre dagiti inbestigador iti innem a kapsula a mapapati a nagtaud iti cal. 45 iti nakapasamakan ti pammaltog.

Kinuna ni Taclas nga iti panagmimitingda iti provincial director, tratarendanto ti topiko mainaig iti grupo ti gun for hire nga agdakdakiwas iti probinsia para iti pannakabigbig daytoy ken iti pannaka-neutralizedda.

Inkalintegan ti police officer a nupay undermanned ti kapolisan iti ratio a 1:1,000, wenno maysa a polis iti sangaribu nga umili nga aywananna, ar-aramidenda amin a kabaelanda a mangtagiben iti urnos ken talna iti probinsia.#