Footer

Handicapped children, tulongan ti Kampi, Danish govt

CANDON CITY – Kinuna ti maysa a dadaulo ti grupo a tumultulong kadagiti ubbing nga addaan iti an-annayen a rumbeng a matulongan dagitoy, saan ketdi nga ibain wenno ilemlemmeng ida.

Kinuna ni Marneli Pacris, coordinator ti Breaking Barriers for Children, a kaaduan kadagiti nagannak kadagiti adda an-annayen dagiti annakda kas iti cerebral palsy, autism, down syndrome, hyperactive nga ubbing, pilay, tuleng, umel, ngongo ken dadduma pay a rangkap ti mangibain ken mangilemlemmeng kadakuada gapu iti pammatida a mauyaw laeng wenno malais dagitoy.

Kinuna ni Pacris a daytoy ti kayat nga ilinteg  ti  Katipunan ng Maykapansanan sa Pilipinas, Inc. (KAMPI) ken panakitinnulong ti Danish Society of  Polio and Accident Victims (PTU) a ponponduan ti DANIDA babaen ti pannakaited iti libre a rehabilitasion, panagadal ken importansia tapno mariknada nga adda met karbenganda nga agbiag a kas iti normal a tao.

Kinuna ni Pacris nga adda dagiti physical therapist, occupational therapist a mangtaming kadakuada ken Special Education (SPED) teacher a mangisuro tapno agbalin dagiti addaan an-annayen nga ubbing a literado.

Kinuna ni Pacris a nationwide ti nasao a programa ken naiyussuaten iti Vigan City ken ditoy a siudad sana innayon a no adda dagiti serbisio a saanda a maited, mangalada iti sabali a non-government organization a katulonganda.

Naipasdek metten ti Stimulation and Therapeutic Center iti public market annex ti Vigan City babaen ti initiatibo ti Danish government a pakataripatuan dagiti addaan an-anayen nga ubbing a sakit kas iti cerebral palcy ken dadduma pay a handicapped children.

Ti siudad ti nakaammo iti pannakaipasdek ti nasao a sentro ket ti Danish government ti mangibaklay iti maintenance ken panueldo dagiti personnel.

“Kayatmi a paruaren dagiti ubbing nga addaan iti kapansanan tapno saanda laeng nga aggigian iti balay… ikkantayo iti pateg dagitoy nga ubbing,” kinuna ni Pacris.#