Footer

HB 2474: solbarenna problema pannakailako produkto a tabako

CANDON CITY – Tapno masalakniban ti produkto a tabako iti pagilian, maysa a gakat ti pinutar ni Ilocos Sur 2nd District Congressman Eric Singson a mangituding a  saan a nababbaba ngem 75% iti produksion ti tabako ditoy Pilipinas ti ipatungpal nga aramaten dagiti tobacco manufacturers iti panagpartuatda iti sigarilio.

Segun ken ni Singson, pinutarna ti House Bill 2474 agsipud ta dakkel a nakaapekto iti panaglako dagiti mannalon iti produktoda iti tabako ti panaggatang dagiti agparpartuat iti sigarilio iti daytoy produkto manipud iti China ken Malaysia .

Kadagiti tobacco producing provinces, 70% iti produksion ti aggapu iti Ilocos Sur.

Ngem iti naangay a Tobacco Summit babaen ti initiatibo ti provincial government babaen ti panangidaulo ni Gov. Deogracias Victor “DV” Savellano, indatag dagiti agmulmula iti tabako a kangrunaan a problemada ti kinalaka ti panaggatang dagiti traders iti produktoda a tabako iti baet a nagngina dagiti mabusbosda iti ganagan, panangtaripato iti mula ken iti pannakaipugon dagiti bulong.

Sagudayen ti R.A. 7171 a pinutar ni dati a Gov. Luis “Chavit” Singson idi nagtakem a diputado iti Umuna a Distrito ti Ilocos Sur, a 15%  iti excise tax manipud kadagiti mapartuat a sigarilio ti bingay dagiti probinsia nga agmulmula iti Birhinia a tabako.

Kinuna ni Dip. Singson nga iti nasurok 30 a tawen a panagmulmula  dagiti mannalon iti tabako iti deppaarna ti Amianan, dakkel a banag a nangital-o iti biagda partikular iti edukasion.

Nakatulong ti industria ti tabako iti panagadal dagiti annak dagiti mannalon, kinuna ti diputado.

Innayon ti diputado a  kadagitoy a tiempo, saan unay a mabigbig ti produkto a tabako ti Pilipinas gapu ta prioridad dagiti cigarette manufacturers ti aggatang iti ad-adu nga amang  manipud iti sabali a pagilian kas iti China ken Malaysia nga aramatenda iti panagpartuat iti sigarilio ket marigatan dagiti farmers  a mangilako kadagiti produktoda a tabako.

Maibasar iti Section 2 ti House Bill 2474, agmulta ti aglabsing a kompania iti saan a nababbaba ngem P10 milion para iti umuna nga opensa; P30 milion para iti maikadua; ken P50 milion  wenno panakapaserra ti establisimiento iti maikatlo a panaglabsing.

Sagudayen pay ti gakat a maipakat daytoy  90 nga aldaw kalpasan ti panangaprobar ti Kongreso nga ipatungpal ti  National Tobacco Administration maibatay iti maaramid nga implementing rules and regulations.#