Helper, nalmes bayat panaglalangoyda agkakadua iti baybay

STA. MARIA, Ilocos Sur – Naay-ayoda a napan naglalangoy iti baybay bayat ti panagparking ti luganda iti igid ti kalsada sadiay Suso Beach, Barangay Suso ditoy nga ili idi malem ti Agosto 2 ngem dida ammo a napigsa ti koriente. Resulta: nalmes ti maysa kadakuada.

Iti report ni Erwin Vendiola, Municipal Disaster Risk Reduction Management Council Officer ti Sta. Maria, Ilocos Sur,  nalmes ni Adonis Domanillo y Parrilla, 30, naasawaan, truck helper ken residente iti Lot 3, Block 6, Calibutbut, Bacolor Pampanga bayat ti panaglalangoyda iti kabaybayan ti Suso idi agarup 3:15 ti malem ti nadakamat a petsa..

Segun iti inbestigasion, bayat ti temporario a panagparkingda iti igid ti kalsada a sakup ti Barangay Suso, naay-ayo a napan naglalangoy dagiti agkakadua a pakairamanan ni Domanillo;  Salvador Maaghop y Guapi, 41, naasawaan, driver, residente ti Porac, Pampanga; ken Joe Perez y Baquiarfo, 41, naasawaan, driver, residente ti Edsa Balintawak.

Bayat ti panaglalangoyda, inyagus ti napigsa a koriente ni Domanillo ket nupay pinadas nga arayaten dagiti kakaduana ket saanda a nabaelan.

Nangiwayat iti rescue operation dagiti polis, BFP, coastguard, MDRRMC, ken lumalangoy ket idi agarup 5:10 ti malem, nasarakanda ti biktima nga agtatapaw iti igid ti baybay.

Pinadas ti rescue team a paungaren ni Domanillo bayat nga intarayda iti ospital ngem napaayda ket naideklara daytoy a dead on arrival.#