Hepe ti polis, naaksidente

SANTIAGO, Ilocos Sur – Nakisinnapgid ti motorsiklo ti maysa a hepe ti polis iti sabali a motorsiklo a puon ti nakasugsugatanda a dua.

Naitaray iti ospital para iti pannakaagas dagiti sugatda da Police Inspector Rolando Battulayan, chief of police ti Sigay PNP, residente iti Baac, Batac, Ilocos Norte ken ni Manuel Torres, residente iti San Nicolas, San Esteban, Ilocos Sur.

Iti inbestigasion nga inwayat dagiti polis ditoy, idi nagsilaw ti berde iti matartarimaan a kalsada a sakup ti Barangay Bigbiga ditoy, mapapati a pinataray ni Battulayan ti luganna a Honda XRM, addaan plaka nga AH-1501 ngem nakasabatna ni Torres a nakasakay met iti Honda XRM a motorsiklo, addaan plaka a 2401-AB ket nagsinnapgidda.#