Hepe ti polis ti Tubao, narelibo gapu kadagiti di masolbar a pammaltog

SAN FERNANDO CITY – Maysa manen a hepe ti polis ti narelibo iti puestona ngem iti daytoy a gundaway, gapu iti saan a pannakasolbar dagiti napasamak a pammaltog iti hurisdiksionna.

Impakaammo ni Chief Superintendent Franklin Jesus B. Bucayu, Police Regional Office 1 director idi Nobiembre 13 a rinelibona ni Police Senior Inspector Luis C. Liban kas hepe ti police ti Tubao Police Station gapu kadagiti di nasolbar nga insidente ti pammaltog ken dadduma pay a krimen a nakaapekto unay iti kappia ken urnos iti nadakamat a barangay.

Nadutokan ni Police Senior Inspector Benigno C. Sumawang, Human Resource Development Division officer ti La Union Police Provincial Office (LUPPO) nga Officer-In-Charge agsipud ta awan ti kualipikado a Police Commissisoned Officer a naka-assigned iti Tubao Police Station.

Kinuna ni La Union Provincial Police Chief Senior Supt. Ramon O. Purugganan a naiwayat ti panagbaliw iti liderato ti polis iti Tubao maigapu iti agdama a kasasaad ti urnos ken talna iti Tubao.

Segun ken ni Purugganan, apektado ti nasao nga ili gapu iti umad-adu a bilang dagiti di masolbar a pammapatay ken dadduma pay a krimen a napasamak iti napalabas a dua a bulan.

Iti dayta a tiempo, tinambang dagiti di pay am-ammo a suspek ni agdama a Mayor Dante Garcia  ngem nakalasat daytoy, napapatay ti maysa a barangay kagawad, ken napaltogan ni Atty. Lazaro Gayo, dati a bise mayor ken agkandidato koma a para iti sangguniang panlalawigan.

Kanaig daytoy, naisayangkat ti panagmimiting da Bucayu ken dagiti dadaulo ken miembro dagiti nadumaduma a civil society groups tapno pagbuliganda a pasardengen ti kinadamsak nangruna iti Tubao.

Kinuna ni Bucayu a trabaho ti polis ti agserbi ken mangsalaknib iti kalintegan dagiti tattao ket kasapulanna ti suporta dagiti civil society groups para iti napigsa a panangilungalong iti kappia ken ikokontra iti kinadamsak.

“Our common stand with the civil society groups is that we are against all forms of violence and we will work hand in hand to have a secured and fair elections (SAFE 2013) next year (Maymaysa ti pagtaktakderanmi kadagiti grupo ti sibil a sosiedad ket dayta ti ikokontrami iti amin a kita ti kinadamsak ken agtitinnulongkami para iti secured and fair elections (SAFE 2013) inton umay a tawen,” kinuna ti regional director.

Malaksid ti Amnesty International iti panangibagi ni Melvin Macusi, ti Peacebuilders Group nga indauluan ni Pastor Mariano Apilado, dimmar-ay pay iti nasao a miting dagiti lider ken pannakabagi ti Bannuar ti La Union, Kanlungan North Luzon, ken ti Commission on Human Rights ken dagiti senior officers manipud iti PRO, ni Police Senior Supt. Manolito C. Labador, deputy regional director for operations, La Union Provincial Director PSSupt. Ramon Purugganan ken dagiti dadduma pay a masekan nga staff.

Sumango ni Liban iti inquiry board nga inorganisa ken pinaaktibo ti LUPPO tapno maammuan no adda panagliway ti narelibo a COP iti panangipatungpalna kadagiti pagrebbengan ken responsibilidadna.

Sakbay ken ni Liban, renelibo met ni Bucayu ni Inspector Faustino C. Bandao kas hepe ti polis ti Sta. Cruz kalpasan ti pannakatiliw ti dua a lalaki nga agpappapusta iti hueteng iti area of responsibility ti opisial.

Nangiwayat ti nagtipon a grupo ti Regional Anti-Illegal Gambling Task Force, PRO1 ken ti Ilocos Sur Police Provincial Office iti anti-illegal gambling operation iti Barangay Paratong, Sta. Cruz, Ilocos Sur a nag-tungpal iti pannakatiliw ni Marvin Aba Galinga, 35, naasawaan, ken residente iti Barangay Paratong, Sta. Cruz, Ilocos Sur, ken Jerry Abella Mariano, 37, naasawaan, ken residente iti Barangay Villa Garcia iti met laeng nasao nga ili.

Kinuna ni Bucayu a gapu iti daytoy, narelibo ni Police Chief Inspector Faustino C. Bandao, kas hepe ti polis ti Sta. Cruz, kas panagtungpal iti “One Strike Policy” ti PNP mainaig iti kampania maikontra iti illegal a sugal.

Napilaan metten iti kaso dagiti dua a kobrador iti hueteng a panaglabsing iti 9287 wenno Revised Anti-Illegal Gambling Law.#