High school, plano a maipatakder

CAOAYAN, Ilocos Sur –  Plano ti lokal a gobierno ditoy ti mangipatakder iti pagadalan sekundaria tapno adda as-asideg a pagbasaan dagiti ubbing nga agnaed iti poblacion, daytoy ti kinuna ni Mayor Germie Singson-Goulart.

Nupay adda high school iti Pandan, Tamurong ken Puro, adayo dagitoy a papanan pagbasaan dagiti taga-ili nga ubbing a pakaibilangan dagiti agindeg iti Naguilian, Nansuagao, Anonang Mayor, Anonang Menor, Don Lorenzo Quirolico, Don Querubin,  kinuna ni Goulart.

“Tapno saanda a maadaywan iti pagbasaan, napanunottayo ti mangipatakder iti high school a most probably maipatakder iti lakub ti Caoayan Central School,” kinuna ni Goulart.

Kapaliiwan pay nga adu ti taga-Caoayan ti mapmapan agbasa iti high school iti Vigan City.#