High school student, nalmes

STO. DOMINGO, Ilocos Sur – Nalmes ti maysa a balasitang gapu iti pannakaiyanudna iti pay-as idi malem ti Septiembre 18.

Nainaganan ti biktima a ni Salvacion Tabula y Jaramillo, 12, high school student ti Lussoc National High School, ken residente iti Barangay Paras ditoy nga ili.

Iti panagimbestiga dagiti polis, napan naggala ni Tabula iti kangkong  iti kataltalonan iti asideg ti pay-as idinto a nagdidigos dagiti kakaduana a da Jordan Tagudar, 7; Francis Angelo Taan, 8; Isagani Tabunan, 9; ken Ronald Lor, 14, iti saan unay nga adayo iti yanna.

Napan nagbuggo ti biktima iti pay-as ngem mapapati a naikaglis ket inyanud ti napegges a danum a puon ti nakalmesanna.

Nasarakan ni Jeomar Tugas  y Alcanciado, 29, naasawaan, ken residente iti Barangay Paras, ti bangkay ti biktima iti sumurok kumurang 500 metro ti kaadayona manipud iti nakaikaglisanna.

Naitaray ti biktima iti Tolentino Clinic and Hospital ngem indeklara ti doktor a nangtaming kenkuana nga awanen ti biagna.#