High school student, natinnag iti dyip

NARVACAN, Ilocos Sur.  Gapu iti pannakaisab-itna iti waya ti koriente, natinnag ti maysa a high school student iti tuktok ti para pasahero a dyip a naglugananna iti ipapanda panagbasa ditoy nga ili.

Inreport ni Kapitan ti Camarao Edwin Cabotaje iti polis a natinnag ni Sander Cabudol, 13, third year high school ken residente iti barangay Cadacad iti daytoy nga ili manipud iti dyip a minaneho ni Roberto Cabotaje.

Iti panagimbestiga dagiti polis, naammuan nga agturturong ti lugan iti laud a direksion ket idi makaasidegda iti JL Gas station iti barangay Orence, naisab-it ti biktima iti linia ti koriente ket natinnag iti kalsada.

Insigida a naitaray iti ospital ti biktima.