Hilomen, baro a regional director ti PRO1

SAN FERNANDO CITY- Addan kabarbaro a PNP regional director ti rehion uno.

Iti naangay a turn-over ceremony a naangay ditoy itay Pebrero 29, inallawat ni Police Chief Supt. Romeo C. Hilomen manipud ken ni Police Chief Supt. Leopoldo Bataoil ti rebbengenna kas kabarbaro a PNP regional director ti Region 1.

Sigud a hepe ti Police Security and Protection Office iti Camp Crame Hilomen ken kaklasean met laeng ni Bataoil iti PMA Magilas Class 76.

Nadesignaran ni Bataoil kas hepe ti Directorate for Police Community Relations (DPCR), nga addaan iti two-star rank.

Nag-preside iti seremonia ni National Police Deputy Director for Administration PDDG Jesus A Versoza, kinaklasean met laeng dagiti dua nga opisial.

Iti panagbitlana, nagyaman ni Hilomen ken ni Department of Interior and Local Government Secretary Ronaldo Puno gapu iti panangiyendorsona kenkuana iti nasao a posision.

Kabayatanna, nagyaman ni Bataoil kadagiti officers, men and women ti PRO-Ilocos, kadagiti local officials ken dagiti umili iti Ilocos Region gapu iti suportada kenkuana iti panagbalin ti PRO-Ilocos a numero uno iti sapasap a pagilian iti 2006 ken 2007.

“I have given my Magilas best for PRO1, and now as DPCR, I will help make ‘Mamang Pulis’ the Filipinos’ best friend,” impasingked ni Bataoil. (Danny Antalan)