VIGAN CITY – Awan pay ti suspek ti kapolisan ditoy iti nagsaruno a pannakapapatay ti dua a masuspetsa a drug personality ditoy siudad.
“On-going pay ti inbestigasion,” daytoy ti sungbat ni Police Supt. Elpidio R. Nartates, hepe ti polis ditoy siudad, bayat ti pannakiuman kenkuana ni Peter Rebunal ti DWRS a naipatangatang iti Barangay Commando Brigada a programa ni Jun Ramos no anian ti nagdur-asan ti pannakapapatay ni Roger Cariaga ken ni Dominic Flandez y Sebastian.
Nupay kasta, kinuna ni Nartates nga iti kallabes, adda naipila a tallo a kaso ti panagikut iti droga maikontra ken ni Flandez idinto a mapapati met a nainbolbar iti kaso ti droga ni Cariaga ket innayonna a daytoy ti anggulo a kitkitaenda iti panagimbestigada.
Pinaltogan ti dua a lalaki a nagkalubbon iti motorsiklo ni Cariaga, 45, baro, residente iti Barangay VI bayat ti panagdaliasat ti luganna a chop-chop, kaduana ti live-in partnerna a ni Violeta Camacho y Fontejon, 31, ken ti 6 ti tawenna nga anakda iti Gen. Luna Street, Barangay I idi Agosto 10.
Saanen a naidanon ti biag ni Cariaga iti ospital a nakaitarayanna.
Pinaltogan met ti di nabigbig a suspek a naglugan iti motorsiklo ni Flandez, residente iti Barangay 5 ditoy siudad kalpasan ti igagatangna iti taraon iti maysa a restaurant iti De Los Reyes Street idi agarp alas 11:45 rabii ti Agosto 15.
Kinuna ti hepe a kas maibatay iti palawag dagiti empleado iti Cool Spot, saan a nagbayag ken saan nga imminum ti biktima ket pimmanawen kalpasan ti panagorderna iti makan.
Agpada a cal. 45 ti paltog a naaramat iti krimen.
Kinuna ni Nartates nga ipaamirisda iti crime laboratory dagiti kapsula a narekobreda iti dua a pammapatay tapno maammuan no maymaysa a paltog ti naggapuanna.
“Saan koma a dagitoy (pammapatay) ti makaapekto iti peace and order iti siudad,” kinuna ni Nartates.#
