Historical houses iti Candon, maidukomento

VIGAN CITY – Maysa a draft resolution ti indatag ni Bokal Jaime Singson iti sangguniang panlalawigan a mangidagadag iti konseho ti Candon City iti panangidokumentadona kadagiti historikal a balbalay iti nasao a siudad.

Impalgak ni Singson bayat ti session ti sangguniang panlalawigan nga adda 20 a duog a balbalay iti Candon City a kayat nga ipreserba ti city government ket addan naipila nga ordinansa mainaig iti daytoy.

Kinuna ni Singson a saan laeng koma a ti pannakapreserba dagitoy a balbalay ti maiwayat no di pay ti pannakaidokumentadoda.

“Idukomentadoda koma met ti istruktura, ti arkitektura, dagiti pamilia a naggigian iti daydiay a balay manipud idi naipatakder agingga iti early 20th century tapno maammuantayo ti historiana,” kinuna ti bokal.

Kinuna ni Singson a nairaman iti resolusionna ti pannakaawisto dagiti estudiante nga agpasiar kadagitoy a balbalay tapno maapresiarda ti historia ti komunidadda.#