Footer

Hit and run suspek, dimmagsen ti kasona

CANDON CITY – Dimmagsen ti kaso daytoy suspek ta saanen a naidanon a sibibiag ti tinarayanna nadungparna iti maysa nga ospital sadiay La Union idi parbangon ti Hulio 11.

Napagbalin a reckless imprudence resulting to homicide ti kaso ni John Carlo Paclibon y Avila, 30, natibo iti Barangay San Pedro, Gen. Tinio, Nueva Ecija ngem agnaeden iti Barangay Sabuanan, Sta. Lucia, Ilocos Sur kalpasan nga inreport ni Leticia Fontanilla Tabon iti police station ditoy siudad a pimmusay iti dalan ti kabsatna a ni Henry Fontanilla y Gamilla, 30, bayat ti pannakaitarayna tapno maagasan iti maysa nga ospital sadiay La Union.

Nagsagrap ni Fontanilla iti dunor iti ulo, natukkol ti kannawan a sakana ken nadunor ti nadumaduma a paset ti bagina. Immuna a naipan iti Candon General Hospital ken maiyalis koma iti ITRMC, San Fernando, ngem addada pay la iti Binalonan, La Union idi pimmusay idi agarup 2:45 ti bigat ti Hulio 11.

Maipalagip nga idi agarup 9:45 ti rabii ti Hulio 10, bayat ti panagballasiw ni Fontanilla iti kalsada, partikular iti sanguanan ti bodega ti San Miguel Beer sadiay Barangay Tablac, Candon City, dinungpar ti traysikel a minaneho ni Paclibon.

Mapapati a nakainom ti suspek idi dinungpar ti minanehona a TMX 125 tricycle nga awanan plaka ni Fontanilla. Segun iti report, awan lisensia ti suspek nga agmaneho iti lugan.

Maysa a Reynan Pioquinto y Ibasco, 28, baro ken residente ti San Quintin, Pangasinan, ti nangireport iti estasion a nasaksianna bayat ti ilalabas ti Mitsubishi Strada a luganna iti nadakamat a lugar ti pannakadungpar ni Fontanilla ken ti panangtaray ti suspek iti biktima imbes nga itarayna daytoy iti ospital.

Nadatngan dagiti nagresponde a polis ti grupo dagiti tattao ken luglugan iti Pacquing Street, Barangay San Juan, Candon City ket naammuanda a kinamat dagitoy agingga a naipiskotda ti suspek a nabigbig idi agangay a ni Paclibon. (Tawid News)