Hit and run suspek, simmuko iti polis

CABUGAO, Ilocos Sur – Nabigbigen ti nagmaneho iti lugan a mapapati a nangtaray iti dinungparna nga empleado ti munisipio ditoy idi parbangon ti Mayo 11.

Segun iti polis, nabigbigen ti hit and run suspek a maysa a Florante Tapat y Villa, 46, naasawaan, kagawad, ken residente iti Barangay Namruangan ditoy nga ili.

Boluntario nga insuko ni Tapat ti bagina iti police station ti Cabugao.

Sakbayna, dinungpar ti lugan a minaneho ni Tapat ni Edmar Fernandez y Esteban, 37, naasawaan, municipal employee, bayat ti pannagna daytoy iti provincial road iti asideg ti arko ti Lusong Suyo, Barangay Baclig, ditoy nga ili idi agarup 11:35 ti rabii ti Mayo 11.

Nagsagrap ti biktima kadagiti sugat iti ulo ken bagina ken natukkol dagiti sakana ket naitaray iti Metro Vigan Cooperative Hospital, Bantay para iti pannakaagasna ngem indeklara ti doktor a nangtaming kenkuana a dead on arrival.

Kabayatanna, naiyendorso a makasuan iti opisina ti provincial prosecutor, Vigan City ti drayber ti Partas bus a nainaig iti aksidente iti lugan sadiay Sitio Baoay, Barangay Paing, ditoy nga ili a nakatayan ti dua a tao idi Mayo 8.

Naiyendorso iti opisina ti provincial prosecutor ti kaso a reckless imprudence resulting in double homicide, multiple physical injuries and damage to property maikontra ken ni Mark Anthony Yamson y Reyes, 38, naasawaan, ken residente iti Camangaan West, Moncada, Tarlac.

Maipalagip a nainbolbar iti aksidente ti Partas bus a minaneho ni Yamson ken ti Mitsubishi Lancer a minaneho ni Rowell Macahilas y Fuentes, 40, naasawaan, OFW nga addaan iti Canadian driver’s license ken residente iti Laslasong Norte, Sta. Maria, Ilocos Sur a nakatayan ti maysa a balikbayan ken barangay kagawad.

Segun iti report dagiti polis, agpadaya ti Partas bus idinto nga agpalaud ti Mitsubishi Lancer a minaneho ni Macahilas ket iti nakapasamakan ti aksidente, partikular iti nagkurbaan a paset ti nasao a highway, mapapati nga inobertekan ti Lancer ti maysa a delivery close van ket kimmaut iti linia ti bus a puon ti nagdinnungparanda.

Natay iti nasao nga aksidente da Edgardo Escobar y Pascua, 42, baro, barangay kagawad, ken ni Marissa Macahilas y Escobar, 41, OFW idinto a nasugsugatan ti drayber ti Lancer, ken 4 pay a pakaibilangan da Mary Jane Calso y Escobar, 37, naasawaan nga OFW; Jocelyn Ursua y Escobar, 40; Jose Ursua y Rosario, 42; ken James Ursua y Escobar, 3;, agpapada amin a residente iti Brgy. Laslasong, Sta Maria, Ilocos Sur.

Mapapati a desidido ti pamilia dagiti biktima a mangidadum iti drayber ti bus.#