Footer

Hit and run

BANTAY, Ilocos Sur – Agtultuloy ti panangbirok dagiti polis iti dua a tao a naglugan iti truck a nangdungpar iti maysa a motorsiklo ken nangatal iti backrider iti national highway a sakup ti Zone 5, ditoy nga ili idi Pebrero 2.

Segun iti report, inabandona dagiti di pay nabigbig a tattao ti Isuzu Elf a luganda sadiay Barangay Puerta Real, Sto. Domingo ket mapapati a kimmamangda iti kamaisan tapno saanda a mariput dagiti kumamkamat a polis-Bantay ken Sto. Domingo.

Iti panagimbestiga dagiti polis, agpalaud ti Suzuki a motorsiklo a nagluganan da Rod Parto y Quintua, 19, baro, ken Leonora Sanidad y Valderoza, 17, agpada a residente iti Barangay Cuta, Vigan City ket idi makadanonda iti nakapasamakan ti aksidente, nagsenias ni Parto nga agsikko iti laud ngem dinungpar ti nataray nga Isuzu Elf.

Gapu iti impact, naikras ti lugan iti kalsada. Imbes nga agsardeng, intuloy ti drayber ti truck ti panagpatarayna ket napilidanna ni Sanidad.

Nangipatulod dagiti polis iti flash alarm kadagiti kaparangetda a police stations.

Pinasardeng dagiti polis San Ildefonso ti lugan ngem saan nga intaltalek ida dagiti suspek ket nagtuloy dagitoy a nagpakaskas agingga iti Barangay Puerta Real, Sto. Domingo a nangpanawanda iti luganda.

Nangiwayat dagiti nagtipon a polis ti Bantay ken Sto. Domingo iti manhunt operation ngem negatibo ti resultana.

Naitaray dagiti biktima iti Metro Vigan Cooperative Hospital, Bantay para iti pannakaagasda.#